१. जय जय हे भारत देशा
तू नव्या जगाची आशा
जय जय हे भारत देशा
तपोवनातुन तुझ्या उजळली
उपनिषदांची वाणी
मातीमधुनी तुझ्या जन्मल्या
नररत्नांच्या खाणी
जय युगधैर्याच्या देशा
जय नवसूर्याच्या देशा
तू नव्या जगाची आशा, जय जय हे भारत देशा
बळापुढे वा छळापुढे नच इथे
वाकल्या माना
अन्यायाला भरे कापरे बघुनि शूर
अभिमाना
जय आत्मशक्तिच्या देशा
जय त्यागभक्तिच्या देशा
तू नव्या जगाची आशा, जय जय हे भारत देशा
श्रमांतुनी पिकलेली शेते पहा
डोलती धुंद
घामाच्या थेंबांतुन सांडे
हृदयातिल आनंद
जय हरित क्रांतिच्या देशा
जय विश्वशांतिच्या देशा
तू नव्या जगाची आशा, जय जय हे भारत देशा
पहा झोपड्या कंगालांच्या
थरारल्या भवताली
अंधाराला जाळित उठल्या झळकत लाख
मशाली
जय लोकशक्तिच्या देशा
जय दलितमुक्तिच्या देशा
तू नव्या जगाची आशा, जय जय हे भारत देशा
